«til orientering» (Smykkelova) – les og diskuter
© Malewitch | Dreamstime.com
Les diktet «til orientering» av Frode Grytten nedanfor.
Du kan høyre diktet opplese på NRK Salongen. Det opphavlege innlegget i Bergens Tidende finn du her.
Spørsmål:
Førlesning: Diktet tek utgangspunkt i den såkalla «Smykkelova»? Gjer eit nettsøk.
- Kvifor heiter diktet «til orientering»?
- Kven er «vi» og i diktet, og kven er «du»?
- Grytten skriv: «så skal vi konfiskere gullet i plombane dine» Kva historisk hending er det denne linja siktar til?
- Kva andre verkemiddel bruker Grytten i diktet?
- Kva retoriske appellformer pregar diktet?
- Kva oppnår forfattaren med å skrive eit dikt om denne omstridte lova i staden for å skrive ein artikkel?
Frode Grytten:
til orientering
vi kjem til å ta klokka di
og pengane dine
vi kjem til å ta gifteringen din
og smykket du har rundt halsen
med mindre du kjem opp med
ei aldeles tåredryppande historie
så vil vi konfiskere
øyredobbane dine og mobilen din
og datamaskina di
det er i aller beste meining
vi vil konfiskere sekken på ryggen din
og kofferten i handa di og hatten din på snei
og gåstolen din og kona di
så skal vi konfiskere gullet i plombane dine
og den frakken din som ser svindyr ut
vi kjem til å konfiskere
fiolinen din og saksofonen din
du må også bidra
sjølv om du kjem frå ingenting og har ingenting
og så kjem vi til å konfiskere
dagen din og natta di
fortida di og framtida di
minnene dine vil bli konfiskert
fotoalbum og kosebamsar vil bli konfiskert
håpet ditt og gleda di vil bli konfiskert
du vil få alt igjen om du drar herfrå friviljug
men vi må dessverre konfiskere
språket ditt og songane dine
og himmelen over deg
og havet under deg
blått skal konfiskerast
og raudt skal konfiskerast
og grønt og gult skal konfiskerast
(svart og kvitt kan du framleis ha)
så kjem vi til å konfiskere guden din
han er farlig for oss
det veit du vel
og gps-en din skal konfiskerast
og stjernene du seglar etter
båten din, vegen din, bøneropa dine
og du har kanskje tenkt:
«eg skal gå til eit trygt land,
eg skal gå over grensa til fred»
den tanken er no offisielt konfiskert
til slutt konfiskerer vi deg
vi tar huda di og håret ditt
og munnen din og kjønnsorgana dine
vi tar den eine lunga di
og begge nyrene dine
vi tar auga dine og alt du ser
og alt du føler med hjartet ditt
hjartet ditt er forresten konfiskert
her og no
vi tar beina dine
og dit du har tenkt å gå
og når du står der naken i tjue minus
vonar vi at du forstår at vi gjør dette
til ditt eige beste og fordi vi vil deg vel
velkomen hit
spørsmål?
opp med ei hand
om du lurer på noko!
rekk opp ei hand
så kan vi få konfiskert den òg!
Bergens Tidende 27. januar 2016